Berriak

2019/6/3 Ingurumen albisteak

Energiarik gastatzen ez duen aire girotua? Bai!

Egin ezazue honakoa: putz egin, ahoa ongi irekita duzuela, zuen eskuan. Nabarituko duzue iristen zaizuen airea epela dela. Orain, egizue berriz putz zuen eskura, baina ahoa ia guztiz itxita duzuela, zulotxo txiki bat soilik utziz. Airea freskoago ateratzen dela nabaritu duzue, ezta? Fluidoen dinamikari zor diogu hori. Fluidoen dinamikak dio emari konstantea duen fluido bat hodi lodi batetik finago batera pasatzean, bere abiadura handitu egiten dela, eta ondorioz, bere tenperaturak behera egiten duela.

Printzipio hortatik abiatuta, fisikaren legeekin funtzionatuko duen oinarrizko aire girotu sistema bat eraiki dezakegu, energiarik edota dirudik xahutu gabe. Eta gauza bera egin dezakete, eta hauxe da garrantzitsuena, argindarrik iristen ez den etxaldeetako biztanleek. Nola? Oso erraz, plastikozko botilekin eta kartoi, poliestireno hedatu edo egur kontratxapatu xafla batekin.

Egin beharrekoa honakoa da: botilen zati estuenaren diametroa duten zulotxoak egin kartoi-xaflan, bertatik sartu botilen lepoak eta botilei ipurdia moztu. Ondoren leiho batean kokatuko dugu egitura, leihoaren markoaren azalera guztia estaltzen saiatuz.

Horrela, kaleko aire beroa, botilatik pasa eta botilaren lepo estutik pasatzean, etxera abiadura handiagoan sartuko da, bere tenperatura txikituz (airea ia guztiz itxita dugun ahotik freskoago ateratzen den bezala).

Argi dago horrela ez dugula gure etxea edo bulegoa asko hoztutzea lortuko, baina gune txiroenetan bizi direnek beren etxeak zertxobait freskatzeko balioko du.

Sistema berritzaile honek Eco cooler du izena eta Grameen Intel Social Business enpresak garatu du, bere filosofiak dioen bezala "mundu guztiak eskuragarri izango dituen soluzio teknologikoak bilatuz". Gainera, konpainiak mundu guztiarentzat jarri ditu eskuragarri sistema hau egiteko jarraibideak, albiste honek atxikituta duen dokumentuan.