Udaberriko oporraldian Cristina Enea Fundazioak abian jarri du Cristina Enea parkea beste modu batera ezagutzeko egitasmo berria: orientazio zirkuitua. Ekimenaren arduradun Oihana Orkolagak azaldu duenez, "zirkuituak 1,6 kilometroko luzera du, eta edozein adineko jendeari zuzenduta dago". Parkean zehar burutu beharreko ibilbidean zehar 17 kokaleku aurkitu behar dira, Ingurumen Baliabideen Etxean edota albiste honen atxikituta duen dokumentuan eskuragarri dagoen planoko xehetasunei jarraituz.

Orientazio-kirolean hasi nahi baduzu, ikus ezazu bideo hau, oinarrizko ezaguerak eta kontuan eduki beharreko kontzeptuak jakiteko.

"Badakigu pertsona askok behin eta berriz bisitatzen dutela Cristina Enea parkea, baina susmatzen dugu beti ibilbide bera egiten dutela eta leku berberak bisitatzen dituztela", aitortu du Orkolagak. Horregatik, proiektuaren arduradunak dio orientazioa tresna ezin hobea dela "parkeko txoko ezkutukoenak eta ezezagunenak jendeari erakusteko", duela bi urtetik Ulian 3 orientazio zirkuitu egonkorrekin egiten ari den bezala. "Iaz Cristina Enean eta berriki Urgullen abian jarri dugun Altxorraren bila jolasarekin txikienei gure ingurune hurbila eta bitxikeriak erakutsi nahi dizkiegun bezala, orientazio-zirkuituek adin guztietako jendearekin gauza bera egiteko aukera ematen digute".

Hala, zirkuitu horiei esker, Cristina Eneara lehen aldiz joaten direnek parkeko leku berezi eta esanguratsuenak ezagutu ahal izango dituzte, eta parkera maiz joaten direnek ere asko izango dute ikusteko eta ikasteko; izan ere, Orkolagak dioenez, "parkea zeharkatzen duten bide eta bidezidor ezkutuetatik ibiltzeak beti dakartza ezusteko eta sentsazio berriak".

Orientazio zirkuitu honen bidez, naturara beste modu batean gerturatzeko gonbidapena helarazten dela dio Orkolagak, "kirol pixka bat egiten eta orientazioan trebatzen, Cristina Enea beste ikuspegi batetik ezagutzeko".

Zirkuitua Gipuzkoako Orientazio Taldearekin elkarlanean garatu da. Planoa dohainik eskuratu daiteke Cristina Eneako Ingurumen Baliabideen Etxean, gaurtik aurrera, edota albiste honek atxikituta duen dokumentuan.