Kanoa-irteera programa honek Urumea ibaia, haren ezkutuko txokoak eta duen ingurumen-aberastasuna hurbilduko dizkie herritarrei maiatzaren lehen bi asteburuetan (3-4 eta 10-11). Guztira 8 irteera izango dira, 2 egunero, «parte hartzen duten pertsonek bertako uretan zehar arraun egin eta hiria beste ikuspuntu ezezagun batetik ezagutzeko aukera izango dutelarik. Ordubetez, gutxi gorabehera, Urumeako ur lasaietan barrena ibiliko dira, naturaz inguratutako ingurune batean barrena eta historia eta paisaia uztartzen dituen espazio batez gozatuz. Esperientzia ezin hobea erlaxatzeko, ingurunearekin konektatzeko eta lagunekin edo familiarekin une berezi bat partekatzeko, ibaia barrutik arakatzen den bitartean», azaldu du Ekologia eta Ingurumen zinegotzi Iñigo Garcíak.
Eneko Calvo Cristina Enea Fundazioko teknikari eta irteera horien arduradunak azaldu duenez, «Cristina Enea Fundazioak hainbat urte daramatza horrelako irteerak antolatzen, ibaiari protagonismoa eta denboraren poderioz galdu duen garrantzia itzultzeko». Calvok adierazi duenez, «ibaiko uretatik ingurune pribilegiatu batez gozatzeaz gain, erabiliko diren ontzien ezaugarriek talde-lanaren eta pertsonen arteko lankidetzaren garrantzia ikusteko aukera emango dute».
Egunak eta ordutegiak
Irteerak Loiolako Latsari plazako ontziralekutik abiatuko dira, 14 urtetik gorako pertsonei zuzenduta daude eta garrantzitsua da parte hartzaileek eurek arraun egin beharko dutela jakitea. Irteerak ordutegi hauetan izango dira:
Maiatzak 3, larunbata: 9:00 eta 10:30.
Maiatzak 4, igandea: 9:30 eta 11:00.
Maiatzak 10, larunbata: 15:00 eta 16:30.
Maiatzak 11, igandea: 15:30 eta 17:00.
Izen-emateak zabalik daude www.cristinaenea.eus webgunean, eta 5 €-ko prezioa dute pertsonako. Bonu gisa itzuliko da, Saretuz sareko zenbait establezimendutan trukatu ahal izateko (informazio guztia hemen).
Oharra: Irudian agertzen diren kanoak ez dira erabiliko irteera honetan, baizik eta honako "trainoa" hau, trainera eta kanoa arteko nahasketa berritzailea.
