Planeta Dantzan: Fossile

#Argazkia

Gizakiak hiru planeta behar ditu egungo kontsumo-erritmoari eusteko. Ekoizpenaren, kontsumoaren eta horri lotutako kutsaduraren mailari aurre egitea ezinezkoa da, baliabide mugatuak dituen planeta batean bizi baikara. Nola helarazi ideia hori gazteei eta haiengan jarrera-aldaketak eragin?

Testuinguru horretan kokatzen da "Planeta Dantzan" Artea eta Ingurumena programa. Ekimen honek arte-lanetan oinarrituta emozioetara zuzenean iristearen alde egiten du, eta ekintzara mugiaraziko gaituen erreakzioa eragiten saiatzen da.

Hezkuntzan aintzindaria izan den ekimen honek, Sirenes - Isaslaminak obrarekin, itsas ekosistemen aberastasunaren eta haien mehatxuen gaiari heldu zion iaz (eco-sirenes.eu). 2020-2021 ikasturterako ikasleak ingurumen-erronka berri bati buruz kontzientziatzea bilatzen da: natura-baliabideen gehiegizko ustiapena eta gure bizimoduak ingurumenean duen eragina, Martin Harriaguek sortu duen Fossile- Fosil obraren bidez.

Iazko esperientzia onaren ondoren, ekimena Donostiako Bigarren Hezkuntzako lehen zikloko 15 eskola-talderi zabaldu nahi zaie berriro 2020/2021 ikasturtean. Covid-19ak eragindako egoera dela eta, protokolo bat ezarri da proiektuaren fase guztietan osasun-segurtasuna bermatzeko helburuarekin.

Ikastetxeentzat erabat doakoa den ekimen honek hezkuntza-curriculumaren helburuak indartzen ditu eta kronologikoki osagarriak diren lau sentsibilizazio-ekintzak osatzen dute:

  1. Testuinguruan kokatzeko saioa: ingurumen-hezitzaile batek eta koreografo batek zuzendutako saioa. Bertan, kontsumoan oinarritutako egungo bizimoduak, planetan eragiten dituen ondorioei buruz hausnartzera gonbidatuko dira ikasleak. Gogoeta horrekin batera, dantzarekin eta gorputz-adierazpenarekin lehen harremana izango dute.
  2. Obra ikusi eta dantzariekin solasaldia: Fossile obraren emanaldi berezia, proiektuan parte hartzen duten ikasleei soilik zuzendua. Ikuskizunaren ondoren, dantzariekin eta koreografoarekin solasaldia izango da artistaren ikuspegia ulertzeko eta balletaren mundua hobeto ezagutzeko.
  3. Koreografia-saioa: Malandain Ballet Biarritzeko dantzariek dinamizatuta, Fossile obraren mugimendu eta sekuentzia koreografiko esanguratsuenetako batzuk landuko dira.
  4. Material didaktiko osagarria: gehiegizko ustiapenaren gaia lantzeko eta curriculumean txertatzeko asmoarekin, online jarduera didaktiko sorta bat diseinatu da, proposamen osagarri gisa.

 

Proiektuen zerrenda ikusi