Udan gaude dagoeneko, eta agian aldaketaren bat nabaritu duzu zure gorputzean. Argi-ordu gehiago ditugunez, kalera gehiago ateratzen gara eta ongizatea eragiten diguten hormonak sortzen ditugu. Kontrakoa ere gertatzen da. Pertsona batzuk nekatuago sentitzen dira edo alergiaren bat izaten dute. Aldaketa horiek urtaroen ziklo naturalaren parte dira, eta aldi baterakoak. Baina, zer gertatuko litzateke aldaketak askoz ere bortitzagoak balira eta askoz denbora luzeagoan iraungo balute? Gelditu al zara pentsatzen aldaketa iraunkor horiek nola eragin diezaieketen beste izaki bizidunei? Gaur animaliak ingurunera eta klima-aldaketara nola egokitzen diren hitz egingo dugu.

Klima-aldaketa klimaren egoeran denbora-tarte luze batean gertatzen den aldaketa da, gizakiaren jarduerari egotz dakizkiokeen arrazoiengatik nahiz arrazoi naturalengatik, Klima Aldaketari buruzko Gobernu Arteko Adituen Taldeak (IPCC) argitaratutako Glosarioan jasotzen den bezala. Aditu-taldearen ondorioen arabera, gaur egun tenperaturen igoera globala bizi dugu, zalantzarik gabe giza jarduerak eragindakoa. Horrek lehorte eta uholde muturrekoen maiztasuna eta larritasuna areagotzen ditu, poloetako izotza urtzea eta itsas mailaren igoera eragiten ditu. Faktore horiek guztiek ekosistemen oreka eta, beraz, ingurumen-baldintza jakinetara egokituta dauden ehunka espezieren biziraupena mehatxatzen dute; izan ere, baldintza horiek espezieek jasan dezaketena baino azkarrago ari dira aldatzen.

Informazio gehiago