Cristina Iglesias artistaren Hondalea obra doan bisitatu daiteke Santa Klara uhartean joan den ekainaren 1etik. Hala ere, obrara eta uhartera bisita gidatuak ere egin daitezke. Bisita horiei esker, Iglesiasen lanari buruz gehiago ikasi ahal izango dugu, baina baita uhartearen ingurumen-aberastasunari buruz ere. Bideo sorta batean xehetasun deigarrienak erakutsiko dizkizuegu. Gaur egun, garai batean uhartean bizi izan ziren mojei buruzko istorio bitxi eta ezezagunaz hitz egingo dizuegu.

[BIDEOA ALBISTEAREN AMAIERAN]
 

​Dena ur iturri batean hasten da, eta uharteko antzinako biztanleak, moja klaratarrak, bertara joaten ziren edatera eta arropa garbitzera. "Gaur egun, edateko ura kanalizazio batzuetatik iristen da uhartera, baina antzina, bai farozainak bai hemen bizi ziren mojek urez hornitu behar izaten zuten uharte osoan dagoen iturri bakarrari esker", dio José Mª Hernández Cristina Enea Fundazioko zuzendariak. Mojen iturria edo mojen garbitokia esaten zaio.

Kondairaren arabera, mojetako bat Igeldon bizi zen artzain batekin maitemindu zen, eta egunero joaten zen uhartera itsasbehera aprobetxatuz. Hala ere, topaketak laburrak izan behar ziren, "Artzainak lehorrera itzuli behar baitzuen marea igo baino lehen", azaldu du Hernandezek, eta gaineratu du gaur egun ere, itsasbehera handiko egunetan, posible dela Santa Klara uhartera oinez iristea.

Santa Klara uharteko biodibertsitateari, historiari eta ingurumen-aberastasunari buruzko datu bitxi gehiago jakin nahi badituzu, kontrata ezazu hemen abuztuaren 31ra arte euskaraz, gaztelaniaz, ingelesez eta frantsesez eskuragarri dauden bisita gidatuetako bat (prezioa 25 € pertsonako).