HidroLogikak 2019

1860tik aurrera, bere harresiak eraitsiak izan ondoren, Urumea ibaiaren estuarioaren hareatza eta paduren gainean eraiki den hiria da Donostia. Ibaia eta itsasoa elkartzen ziren azalera zabalean, ibaiaren lehortzeak eta bideratzeak hainbat zabalgune, hiriaren erdigunea, Amara eta Gros auzoen eraikuntza ahalbidetu zituen.

Urtero HidroLogikak proiektuak gai bat hartzen du idatz eta horren inguruan jarduera programa zabal bat prestatzen du. 2019ko ediziorako Urumea ibaiaren ertzetan topatu dezakegun industria ondarea izango dugu gai nagusia.

Historiako garai desberdinetako industria garapenetan Urumea ibaiko urek bustitzen duten lurraldeak eta gizarteak etengabeko esku-hartzea eta eraldaketa bizi izan dute, eta horrek industria ondare aberats eta askotariko bat sorrarazi du, hala euskarri materiala (lantegi eraikinak, makinak edo industria instalazioak), nola industria paisaiak (tokian tokiko natur baliabideen eta garapen energetiko edo teknikoaren arabera taxutuak) eta lanaren ondare ukiezina (lanbideak, adierazpide kultural eta estetikoak, lekukotasunak, tradizioak eta dokumentuak). Baina nola ez, kontuan hartu beharko dugu industria garapen honek Urumeari eta bere naturari eragindako inpaktoa ere.

Ura materia gisa

Urtebete baino gehiagoko edizio-lanaren ondoren, Cristina Enea Fundazioak "Ura materia gisa" liburua argitaratu du, HidroLogikak egitasmoaren lekukoa hartuz hamaika gai lantzen dituena, besteak beste uraren kudeaketa Donostian eta beste udalerrietan, gure ibaien egoera, beren defentsan aritzen diren ekimen sozialak, ingurumen-gatazkak edota urak memoriarekin duen lotura metaforikoa eta materiala. Era berean, Urumea eta bestelako ibai-ekosistemetara eginiko gerturaketa artistikoak ere jasotzen ditu.

Argitalpenaren helburua da gordailu eta memoria bat sortzea HidroLogikak 2016 egitasmoaren inguruan, eginiko jarduerak eta mobilizaturiko ezaguerak barne. Liburuak 30 lagun eta eragile baino gehiagoren ekarpenak biltzen ditu, Euskal Herritik bertatik, eta kanpotik ere, modu batean edo bestean uraren, ibai-ekosistemen, memoria sozial eta kulturalaren edo lurraldearekin konprometitutako jarduera artistikoen zaintzan eta defentsan hausnartzen eta lan egiten dutenak.

Proiektuen zerrenda ikusi